مدونة سلمان البحيري مدونه ثقافيه منوعه
تعال معي نتعرف على الخطوات, وتذكر, الموضوع مطلعش معقد قوي زي ما انا كنت فاكر
الخطوة الأولى
اكتب كتابك !
قد تبدو الخطوة بسيطة ولا تحتاج رغي وتفصيل مني, لكن اسمع الكلمتين دول مفيدين لك في أول مرحلة
عاوز تكتب عن اي موضوع, اطلق لنفسك البراح, اكتب بس اللي انت حاسه واللي على اطراف صوابعك !
لكن عايز تخوض تجربة النشر, خاصة لأول مرة, فكر كويس انت هتكتب ايه ولمين, شوف المساحة اللي انت ناوي تحتلها في سوق الكتب, انزل اتفرج على الكتب الاكثر مبيعا, اسأل اصحابك اللي بيقرأوا ايه العناوين اللي هتشدهم, انا فاهم ان في دماغك مشاريع كثير للكتابة, حاول تختار موضوع انت فعلا حابه …لكن برده موضوع هتلاقي اللي ينشرهولك , وهتلاقي اللي يشتريه
الخطوة الثانية
جهز الكتاب
انت شخص غريب عند كل ناشر هيوصله كتابك, انت كشخص بالنسبة له لا تعني شئ, مفيش ناشر عنده استعداد يديك لحظة تعاطف او مساندة اضافية, انت بالنسبة له مجرد ايميل وصل له, لو شعر بقلة قيمته هيمسحه من عنده والموضوع ينتهي هنا
يعني, فيه فرق ما بين صاحبك اللي هيقرا شغلك ويقلك جميل, حتى لو الفونت كان صغير, او كان فيه اكثر من خطأ لغوي, او اخراج الصفحة كان فقير, صاحبك ممكن تتعشم فيه لكن الناشر لا
تجهيز كتابك يعني … اولا طبعا تجمعه كله على بعضه, ملف واحد, نسخة “بي دي اف” ونسخة “وورد” , ثانيا حاول تجهزه قد ما تقدر بحيث يبقى شبه النسخة النهائية, يعني تخلي مكان للغلاف (لو تعرف اصلا تصمم غلاف بسيط مع نفسك يبقى هائل) , تعمل فهرس, ترقم الكتاب ! , ظبط مقاس الصفحة لو هتعمله ايه-5 مثلا , فونت 12 اريال , شوية اخراج يعني الصفحات تبقى متقسمة بشكل منظم قد ما تقدر ما تبقاش الفقرات متقطعه بين الصفحات, لو كتابك متقسم فصول تعمل صفحة لعنوان كل فصل مثلا , هات اي كتاب مطبوع وحاول تخلي كتابك شبهه من الاخر , ثالثا: المراجعة الفنية: وديه تتضمن انك تعرض اللي عملته ده على مجموعة من صحابك المقربين اللي انت عارف انهم بيقروا كثير, واعرف رايهم النقدي ايه اللي لازم يتحذف وايه اللي يتضاف وايه اللي يتعدل, ومع كل تعليق حاول تعدل على كتابك , لسه فيه احسن , واخيرا: المراجعة اللغوية: احيانا الاوفيس العربي بيكون مفيد حاول تستعمله, حاول تراجع على نفسك, طبعا اصحابك او حد تعرفه شاطر في العربي يراجعلك, مش لازم توصل لحاجة مثالية لان الدار مسئولة نسبيا عن المراجعة برده, لكن على قد ما تقدر
كتابك جاهز ؟! ..قلب فيه كده! يعجب ؟! .. خش على اللي بعده
الخطوة الثالثة
جهز الايميل
هنحتاج نعمل ايميل, رسالة, المفروض هتبعتها لدور النشر اللي هتطلب منهم نشر كتابك, الايميل ده بنفس أهمية الكتاب بالظبط !
فهنحاول نتعامل معاه بشوية جدية, واهتمام زيادة شوية
بداية من العنوان بتاع الايميل: اللي لازم يكون مختصر مفيد, انا استخدمت حاجة زي : حكاية صنم– كتاب – أحمد الفقي
هم دار نشر فده اللي متوقعينه, حد باعت كتاب عايز ينشره, طبيعي مش منتظرين طلب صداقة مثلا, فعاوزين يشوفوا هو كتاب ولا قصة ولا شعر , اسمه ايه, ومين اللي باعته , ده بيكون كافي انه يفهمهم ايه ده ويعرفوا يرجعوا تاني للايميل لما يحتاجوا, انا شفت الفورمة ديه ظريفة, فكر برده في حاجة تبقى كويسة
جوه الايميل انت محتاج تعمل فورمة رسمية شوية, السيد/ السيدة الفاضلة , اه الايميل بالعربي ! , فقرة قصيرة سطرين بتعرفهم هو ايه ده؟ ايميل بتعرض فيه كتاب عاوز يطبعوه , بعدين تدخل في الموضوع على طول, الفقرة الرئيسية, الكتاب نوعه ايه بيتكلم عن ايه برده بالاختصار المفيد, اللي يدي فكرة وميرغيش كثير, ويبقى جذاب , حاجة بتاعت 3 سطور, الفقرة اللي بعد كده, ملخص مثلا فيه عدد صفحات الكتاب , وانه متنشرش قبل كده, وانت الكاتب بتاعه, معلومات عن الكتاب, الفقرة الأخيرة ممكن تعرف بنفسك في السريع, انت مين وبتعمل ايه في حياتك, وتختم بقى ويسرنا ان نتعامل معكم وفي انتظار ردكم
طبعا ترفق الكتاب, انا بفضل ارفق النسخة البي دي اف, وابعت الوورد للمهتم بعد كده, من باب الاحتياط! شوف اللي يريحك
الخطوة الرابعة
ايميلات دور النشر
انا عارف ان الخطوة ديه هتبسطك, ويمكن تنط المقال كله عشانها, مش خسارة فيك بس نصيحة برده اقرا الكلام اللي فات واللي جاي مهم,
ديه شوية ايميلات جمعتها لدور نشر مصرية, طبعا اللي موجودين اكثر من كده بكثير انت وشطارتك بقى, وشير في الخير برده لو تعارف حاجة تانيه لاخوك
المكتب المصري الحديث may642003@yahoo.com
دوّن info@dardawen.com
الفاروق عمر alfaroukeg@gmail.com
بلومزبيري قطر bqfp@qf.org.qa
الرواق rewaq2011@gmail.com
المصري elmasrypublishing@gmail.com,
دار العين elainpublishing@gmail.com,
الشروق dar@shorouk.com,
اطلس atlas@innovations-co.com
روافد rwafead@gmail.com
الربيع العربي rabe3arabe@gmail.com
المصرية اللبنانية arabia@almasriah.com
الثقافة الجديدة elguindimohamed93@gmail.com
دار الكتب
دار رواية rewayah2012@hotmail.com
دار رواية rewaya12@hotmail.com
دار التنوير info@dar-altanweer.com
دار كيان Kayanpub@gmail.com
دار كتابي kitaby@yahoo.com
دار النسيم daralnassim@yahoo.com
دار نون info@dar-noon.com
نصائح متعلقة بالخطوة ديه: اول ما تسمع عن اسم اي دار, خش على جوجل, الحياة بقت اسهل في عصر التكنولوجيا ! في الاغلب المفروض تلاقيلهم صفحة على الانترنت فايسبوك اي حاجة, وان مكنش فهم في الاغلب دار اي كلام, وهتلاقي في الصفحة الكونتاكت –الايميل بتاعهم , الاسهل انك تبعت لكل الدور نفس الايميل وتخلص نفسك, بس متنساش تحطهم في ال BCC
انا شخصيا تلقيت ردود مثلا من 30% من الايميلات ديه ! و 10% هم اللي كانوا ردود شيئا ما ايجابية , فده طبيعي متتخضش !
انا مبعتش لكل دور النشر مرة واحدة خليتها على مراحل, بغرض اني ممكن اعمل تعديل او الاقي تعليق لما ابعت لحد منهم
الخطوة الخامسة
يسعدنا نشر كتابك
المفاجأة ان الموضوع خلص عند كده, انت مفيش حاجة تانيه هتعرف تعملها –الا بعض النقاط في الخطوة الجاية- انت بس هتنتظر الرد من دور النشر, طبيعي ان الموضوع بياخد وقت, اسابيع ويمكن بعد شهر او اثنين الدار ترد عليك, خد بالك من التوقيت “الشهر” , مثلا الشهرين اللي قبل المعرض وبعديه بيكونوا مش مركزين في تلقي كتب جديدة, وبتفرق ظروف كل دار ومدى انشغال المقيمين بتوعها, خليك في بحث مستمر عن دور نشر جديدة “ايميلات” وكل اسبوع تحاول تبعت لكام دار, وتخليك في الانتظار, وكذلك تعديل وتطوير كتابك
دلوقتي جالك رد ايجابي من الدار, انهم عاوزين ينشروا كتابك, ايه الحاجات اللي محتاج تعرفها؟
1- ارجو اني مش هصدمك, بس في الطبعة الأولى انت هتدفع فلوس مش هتاخد ! الموضوع بيختلف من دار نشر للثانية وحسب الطبعة قد ايه, بس اعتقد ان المبلغ هيكون تقريبا 3000 جنيه, لو بنتكلم على طبعة 3000 نسخة, كل دار هتلاقي ليها نظامها في التعاقد, وانت هتطلب منهم العقد اول الكلام, في الاغلب هم عندهم عقد نموذجي للكتاب الجدد, توقع حاجة في الحدود ديه, هم في النهاية مش هيشيلوا مخاطرة كاتب جديد, انت ممكن تاخد نسخ مجانية باللي دفعته, وهم بيجربوا الطبعة الأولى لو نجحت, بيعملوا هم الطبعة الثانية على حسابهم ومن هنا تبدأ تأخد نسبة من المبيعات, هتكون صغيرة برده, متحطش في دماغك ان كتابك الاول هيجيبلك مكسب على اي حال ! فيه كتاب كبار, بيطبعلهم كتب ومبيطلعوش منها بمليم ده عادي
2- لو حظك كويس وجالك اكثر من عرض, متركزش على الماديات بس, شوف الدار شغلها عامل ازاي, مين الكتاب اللي بيكتبولها, شوف مدى انتشار كتابها في المكتبات الرئيسية, مستوى الدعاية عندهم, سمعتهم عامله ازاي حد كاتب عنهم حاجة سلبية على الانترنت, طريقة شغلهم ناس مهنية ومحترفة ولا ايه.
3- اقرا العقد كويس, حاول تحتفظ بحقوق النشر الالكتروني, جرب تفاوض في نسبتك وفي المبلغ اللي هتدفعه في الاول قد ما تقدر, مدة التعاقد “الاحتكار” كل ما كانت اقصر احسنلك, بس ده هيتوقف على نظام الدار.
4- انت هتسلمهم الكتاب نسخة “وورد” والمفروض هم هيكملوا تعديل وتصحيح لغوي ويبعتهولك قبل الطباعة لو عندك تعليقات, التصميم مسئولية وتكلفة الدار, ولو معجبكش اعترض واقترح تغييرات انت شريك في القرار, هتمضي التعاقد وتدفع الفلوس, وتابع معاهم لحد ما ينزل الكتاب, وحاول تبدأ تجهز انت لشوية دعاية مع نفسك بمعاونة اصحابك متعتمدش على الدار قوي
الخطوة السادسة
البهاريز !
شوية نقط مهمة كده نختم بيها الكلام
1- الكتابة مجال كبير, لو عايز فعلا تبقى جزء منه, ركز في بناء علاقات جواه, اتعرف على قد ما تقدر على كتاب, ابني صداقات في المجال, حاول تقرب من الكتاب الجدد وتشوف تجربتهم كانت عامله ازاي, احضر حفلات توقيع واسالهم عن خبراتهم, ده الاساس انك تبدأ تبني نفسك في المجال.
2- ارسال الايميلات مش الطريقة الوحيدة, انت ممكن توصل لارقام تليفونات او تقابل اصحاب دور نشر, او تروح تزورهم في المعرض او مقراتهم, ديه وسيلة اكثر فاعلية, وهتضمن شيئا ما اهتمامهم بالعمل, اكيد تعرف حد يعرف حد صاحب دار نشر !, دور كده في معارفك, رقم تليفون, مكالمة تليفون وتبعتله الكتاب, ممكن تلاقي اهتمام افضل
3- ازاي تضمن انهم مش هيسرقوا الكتاب ؟! , الصراحه مفيش ضامن, لو عايز روح سجل كتابك الاول عشان تحفظ حقوقك الفكرية والكلام ده, لكن بيني وبينك مش مستاهله, خاصة لو هو كتاب فكري مش بحث او شعر او رواية مثلا, موضوع ان الدار تسرق شغلك ده غير محتمل, هم عندهم بدل الكاتب الف, خاصة لو انت كاتب جديد وبشروط تعاقد انت اللي هتدفع فيها, الموضوع امان, فيه حاجة انا عملتها باعتبار كتابي كان عبارة عن مقالات مجمعة, كنت عملت عينة, ملف لوحده فيه كام مقال اخترتهم من الكتاب, وكنت ببعتهم الاول قبل ما بعت الكتاب, بس بعد كده بقيت ابعت الكتاب نفسه, فيه دور نشر بتطلب عينات بس, جهزها وممكن ترفقها مع الايميل برده, بس ملخص الكلام ان هو ده النظام مفيش ضامن ! بس مفيش خطر برده!
4- وسيلة أرخص: هو فيه وسائل او سكك تانيه للنشر غير كده, اولا ممكن تفاوض الدار في عدد النسخة وتعمل نسخة اصغر, هم مش هيكونوا مبسوطين من كده, مش مصلحتهم وحسب هي دار كبيرة ولا صغيرة/ جديدة هتكون سماحية التفاوض معاهم, فيه ناس بتنشر كتبها على حسابها تماما, يعني بيروح يسجل الكتاب بنفسه بعدين يروح لمطبعة بالكتاب, ويطبعه عندهم وياخد هو النسخ ويلف بيها على المكتبات يسيبها عندهم ولو اتباعت يروح يلم منهم نسبته, ديه سكة انا مجربتهاش, لكن اعرف اللي عملها وهي ارخصلك!
5- ركز ان التجربة الاولى دائما, انها هتكون للتجربة, متتوقعش النجاح المبهر او السهل ! , خليها حاجة تتعلم بيها الموضوع, وخليك طوّل الوقت ماشي في كتاباتك الجديدة والتجربة ماشية بالتوازي, انا الموضوع خد مني سنة ونصف من اول ما بدأت ادور على دور نشر! وخد مني اني اجلت مشروع كتاب وكتبت واحد تاني ! الموضوع محتاج صبر, ولازم تعمله بروح وتفاؤل, وزي ما قلتلك خليك قريب من الناجحين , النجاح هيقرب منك.
ارجو مكنش طولت عليك وقلتلك حاجة مفيدة وجايز فيه حاجات مغطتهاش لضعف تجربتي او نسياني,
أحمد الفقي
